花想容

某美容院……

　　「小姐，其實妳的皮膚挺不錯，又白又滑。但妳是否經常夜瞓，眼袋頗為嚴重。別怕，我有一枝眼部精華素，臨瞓前用一次，包妳一星期後雙眼靚過宋慧喬。」

　　「唉，做了幾年I-Bank，日日瞓三四粒鐘，又要左飛右撲，飛機艙又特別乾燥，這幾年的皮膚，比我當年在美國讀書時差得遠。當年班鬼仔見到我的手手腳腳已經嘩嘩聲，鬼妹特別多雀斑，跟我冇得比。」

　　「辛苦幾年，賺夠上岸，不知幾令人羡慕。可憐我只得間舖頭仔、兩張床，捱到連手都『鞋』埋，賺那一千幾百，未知幾時見岸。每次想起，都有些眼濕濕……嗚嗚……」

　　「此言差矣。人必自侮然後人侮之，兩張床仔一樣可以做到風生水起。大家都係女人，唔幫妳幫邊個？聽我講，照我說話做，包保妳將來做上市公司主席。」

　　「真係？等我抹番D眼淚先。」

　　「聽住。妳現在開始狂賣套票，買一送十，令小姐太太個個覺得抵到爛，買妳十張八張，先賺其頭寸。至於賺蝕與否，慢慢計數。

　　「所有套票有效期兩年，預鬆少少，計多一年，總之三年內未用完的套票全部淨賺。如果生意做得夠大，這些過期的預付套票，分分鐘可以賺四五千萬。」

　　「聽落就容易，我現在又要供樓，又要養屋企，生意做得再大，都是公司錢，自己一毫子都冇得落袋，就算出糧給自己都要出得有譜，諗落都愁，嗚……嗚……」

　　「放心，要向公司提款，易如反掌。妳請令壽堂問公司借錢，借其八千幾萬都冇有怕。到時到候，說母親欠缺財務資源，兼夾年事已高，八千幾萬當粉筆字抹走，全數淨袋，爽。」

　　「還有，……。」

　　「噢，對不起。聽得太過興奮，搽mask搽落咗，抹番。還有什麽？」

　　「還有，要公司幫妳供樓。妳想住邊？住赤柱OK？買層樓，要公司交租，讓妳當宿舍住，到時不費分毫有樓揸手，女人始終要有間自己嘅屋先有安全感，係嘛？」

　　「嘩，安樂晒，幾時都話妳叻女。幾時可以開始？」

　　「別心急，敷完mask再講。」