最高境界

種植道……

　　「老公，又有傳言話我們賣報紙快將事成，繪影繪聲，你今朝看過沒有？」

　　「夫人，我成日跟你講，清者自清。他們要做濁者，由他們去吧。」

　　「果然是腹有詩書，講句說話都零舍唔同，言外有音，抵我嫁畀你。但傳言歸傳言，外間都有微言，指二少師承美國投資銀行，身邊又有高手群臣簇擁，對守業經營毫無興趣，只喜歡將一間二間的公司，當新奇士橙一箱箱買回來斬件分裝打包再賣，賺其差價，食大茶飯。你那班fans怕他會重施故技，將你份心血搞至鬼五馬六，又擺出街兜售。」

　　「哈哈……哈哈哈……，我是何許人也？我在股市近身觀察三十多年，難道我這半生是白過？他伯爺我都認識，佢位公子都要叫聲我做uncle。超人我都見過，還有什麽人可以瞞得過我雙眼？」

　　「老公，莫非你胸有成竹？」

　　「股票市場上上落落三十幾年，乜都見過晒。今次世侄要攞我份心血玩財技，我都想開開眼界，看看他是否叻過超人。」

　　「咁高深？講少少聽吓？不過，精簡一Ｄ，咪好似你寫Ｄ文咁長，我怕我未聽到尾已經瞓着。」

　　「世侄以前賣電視，打正有機會入大陸的幌子，讓鐸叔睇中；加上佢談判技巧高超，在遊艇上講明自己趕住走，時間無多，得就得，唔得就拜拜，卒之成事，賺其第一桶金，不過這桶金就夠好多人食一世咯。

　　下一着借殼上市，食正科網熱潮。珠玉在前，他那雙翻雲覆雨手，自然多人跟。就算借錢買電話，這隻現金牛再瘦都有幾磅肉，加上是上市公司，要開動股票機器施展財技，總有方法。」

　　「這些我都知，使鬼你講！」

　　「我份心血就唔同。人人都說是夕陽行業，連記者都話這行冇得做。要sell概念，聰明如我都未諗到有乜angle。仲有，報紙入大陸，仲難過電視。電視都可以做些沒有地域界限的娛樂節目。報紙？隨時中半山已經冇興趣睇天水圍的新聞，何況是過咗深圳河？

　　還有，我份心血，中環就應該銷量第三，過咗條金鐘道，真係出少一日都無人覺。不單只唔係現金牛，計我話直情係泥牛，一過維多利亞港，隨時唔見咗半隻。畀完幾億，佢仲要掉多幾億入來加碼。

　　咁仲未算，還要看看他怎樣在一間私人公司施展妙技。借殼上市不比當年，用真正白銀買殼，再向大股東收購，看來要將這份報頭估多幾個億，才可以賺回成本。前前後後，加加埋埋，難度比世侄之前的代表作高很多。我辦心血的目的，就是要教化世人如何在股票市場搵食。如今我捨報求仁，用畢生心血，配合未嘗敗績的超人二少，為讀者示範終極一幕股場絕技，是為最高境界也。」

　　「厲害！教育含量，勝過寫多十幾年。」

　　「我還有後着。將來他搞到唔湯唔水，我再搵人買番。」