過時

報紙財經版股市行情表，睇怕要改改排陣，發明一些新的指標，否則師奶阿伯再用些過時的口頭禪落盤炒股票，死得人多。

　　例如P乜P物中，最多人講的P/E。師奶阿伯聽聽埋埋，淨係知道P/E高等於貴，但何謂高何謂低，就人云亦云，靠報紙指點迷津。其實嚴格來說，P/E都可以有科學根據。

　　O的reciprocal，其實就代表投資者的回報率要求，廿倍P/E就是5％。如果大家想用現金計value，拿EBITDA粗粗地當是現金流，一計個P/EBITDA，就大概可以估計是否物有所值。換言之，P/E高低，並非用香爐灰醫病，毫無科學根據。

　　不過，自從那個E或者EBITDA變晒形之後，單憑個P/E已經無甚意思。EBITDA入面自從混雜許多與現金無關的盈利，以上所講的科學根據已經不復存在，那個reciprocal都未知用來discount什麽。換言之，P/E真正變成香爐灰。

　　另一個P╱B更慘。雖然師奶阿伯炒股票，無人想過公司清盤要同公司分身家，但如果知道自己真金白銀買回來的股票，究竟有幾多實際資產在手，可以求個安心。

　　以前擺得上簿叫資產，一定要夠硬淨，睇唔到摸唔到，未夠資格。

　 　現在，成本簿隨時可以有過半資產是計出來，分分鐘化為烏有。如果師奶阿伯睇完報紙，然後說：「你同我定，我呢隻股票，每股資產都有個半，兩蚊買佢唔算太 貴，點輸都輸唔到入肉。」弊在，個半入面可能有一蚊是垃圾。純粹靠揭報紙望住份股市行情表炒股票，可能比求其亂買更加危險。

　　其他變得亂晒籠的知名炒股票指標，有機會再寫。一日未有新東西發明，那份行情最好用來墊枱食飯。