潮爆証人

Enron案仍然在審，除了OJ Simpson那類涉嫌情殺案，又或者小甜甜那類爭產案，其他沉悶的商業詐騙案，尤其是鬼佬版本，本地傳媒不會有興趣報道。

　　不過，以Ken Lay的智慧，又怎會在庭上被檢控官鋤死？必定有一些針鋒相對的場面，以求自保甩身，《華爾街日報》有輯錄報道。反正我希望再冒寫尤明實錄已久，有現成材料，讓我可以趕快抄襲成稿，再返回會議室繼續搏殺，一舉兩得。

＊　　　　　　＊　　　　　　＊　　　　　　＊

　　官：你買賣股票，似乎並無跟足SEC條例，你點解釋？

　　Lay：我經常遵守SEC條例。不過，你知啦，條例是重要，但我們都不可以成為條例的奴隸。

＊　　　　　　＊　　　　　　＊　　　　　　＊

　　官：你睇睇這些電郵，睇睇這些員工調查。不單只一名，是許多名員工都說你先玩弄賬目，再行使認股權，是等同犯罪。你有什麽解釋？

　　Lay：大人，馬後炮非常容易。如今成條死屍擺上枱任你劏，你當然可以為所欲為。但當時我在戰場打仗，冇你家陣劏屍咁爽。

＊　　　　　　＊　　　　　　＊　　　　　　＊

　　官：你過往問Enron借錢，又沽Enron股票，套現冚銀行margin calls。其實只要你生活慳皮Ｄ，乜都夠冚。例如你老婆生日，用廿萬美金包咗隻遊艇「失憶號」，風流快活，其實你有大把錢使，係咪？

　　Lay：慳皮Ｄ唔係唔得，但你要明白，我地係美國夢活生生例子，點都要撑住一定程度的生活奢華。況且，你估真係好似閂水喉，話慳就慳？你未豪過，識乜？

＊　　　　＊　　　　＊

　　《華爾街日報》還有大把，有興趣自己睇。