街頭訪問

2008年電視新聞……

　　根據最新調查顯示，《信報》已經超越《蘋果》、《東方》、《太陽》，成為收費報紙銷量最高的一份。為了找尋銷量節節上升的其中原因，我們訪問了幾名市民。

　　「師奶，請問你點解會抽住幾袋餸，胳肋底還夾住份《信報》？」

　　「當然啦，《信報》多贈券送嘛！你睇，今日又送屈臣氏十蚊「Q旁」，上次仲有百佳廿蚊送添。雖然要指定某十日內，還要是上晝十二點前，買滿三百元才用得着，都係抵嘛！怪唔得以前聽人講，有《信報》，冇窮人，原來是這意思。」

　　「後生仔，點解你左手揸部PSP，右手仲揸住份《信報》呀？」

　　「多圖少字嘛，容易睇。嗰份《蘋果》咁多字，邊識睇。《信報》出名字少，七彩圖片大大幅，最啱我們這班玩ICQ大的年輕人，你un唔un？」

　　「阿哥，點解你擔住口煙仔，踎響度印印腳睇《信報》？」

　　「挑！鬼得閒睇佢，我淨係抽起佢份馬經。其他咁鬼大疊，差唔多成磅重，掉都掉唔切。我地班麻甩佬個個都知呢份馬經最準，還有是嗰個孔少林，得閒踢爆馬圈內幕嗰Ｄ故仔，最夠頂癮。嗱，今期佢又話邊個邊個練馬師同邊個馬主夾計，睇到我大開眼界。仲有，馬經中間夾住嗰四版紙先抵死，人地Ｄ鹹濕版略嫌含蓄。呢份？學似股票成分行情表出晒嚟，個研究部真係唔講得笑。」

　　「議員，我見你邊開會邊睇《信報》，是否個會太悶？」

　　「你唔知咩？余錦賢嗰欄開放畀我地幾大黨輪流寫嘛！我要睇睇對手踢爆我地Ｄ乜，實行寫番佢地轉頭。《信報》呢招高，係人都知余錦賢係集體創作，依家仲要由議員執筆，想冇料爆都難。最好開放埋曹仁超畀我寫，等我都講吓做人道理。」

　　綜合以上幾名市民所講，《信報》的確成功從一份小眾、賣得最少紙的報章，轉型成為全港最暢銷的大眾報紙。NOW財經台實習記者，方卓如報道。