1.11.05

黃藥師

2000年,某街市藥材舖……

  「桔梗二錢、川貝三錢、大生地五錢、甘草一錢……搞掂,陳師奶,返去五碗水煎成一碗水,早上一碗,夜晚翻煎,三日後回來覆診。」

  「阿黃,唔該晒,你真是好人『暑』。睇你一表人才,青靚白淨,屈在這藥材舖執藥浪費了你。我大女在銀行打工,我返去叫她留意有什麽好工介紹給你。走先,煲落湯,要睇火。」

  「拜拜,好聲行。」


  陳師奶果然夠眼光,街市藥材舖又怎會困得住我?所以平日阿明阿財去唱卡拉OK,我就去圖書館睇書睇雜誌,就算做街市做藥材舖,我都要做到上市。

  死做爛做邊有發達,當然要做些收購合併才可以搵夠上岸。其實那些所謂財技,又有什麽巴閉,我做街市都識搞。

  首先找一間快要斷氣的上市公司,平平地七百幾萬買兩成九回來,未夠三成,就算它英國有上市都未需要全面收購。之後我就將手上的藥材舖唧入這軀殼,就用十二倍保證利潤作價。這間公司睇怕都冇錢找數,就用市價折讓九成三批股給我,再加CN,到時慢慢還。手上有百幾億股,用一仙批四十五億出街,已經可以執番四千幾萬,爽!

  有間上市的藥材舖,一切好辦,我手上還有大把貨賣給它,執藥一樣。下次就賣咳藥水,方法照舊。

  藥材舖被我上下其手,都應該七癆八傷,但不要忘記我做邊行,執兩劑就可以翻生。一百股合併一股,再削股本,抹走以前的虧損。股價合併後,又有水位讓我批股集資。

  批得太多,未必有人願意接貨。無有怕,供股。先將面值削九成,然後一供三,籌錢後可以還清我手揸的CN。這個供股嘛,一於連供兩年。用五成折讓價供,如果小股東放棄,我接。到時我做回大股東,大把股票在手,又可以重施批股絕技。這三兩道板斧,易過執藥,想窮都難,哈哈……哈哈哈……。

  「阿黃,阿黃,你冇事吖嘛?我係陳師奶呀,你未畀加應子我,搞到我要返轉頭,睇見你望住個太陽傻笑,嚇死我呢個伯爺婆,得閒執劑茶自己飲吓啦!」

12 comments:

gaubinfor said...

方兄其實講緊邊間公司 ?

Anonymous said...

咁都唔知!

邊間公司又做街市又做藥材鋪同咳水???

隻母公司買鋪租俾子公司的藥材鋪。子公司一千年供3次股, 五年做咗5次100合1

唔知係太陽咁溫暖 定係 太陽咁鬼慶!

Anonymous said...

乜原來位元堂有賣咳水o架!

Anonymous said...

咳水是同一集團下的珮夫人..賣嘅!

不過, 最嬲都係好似方兄講 明明街市佬掠小股東錢......仍不知廉恥,仲周圍同人講自己財技了得!?!

HK 會計師公會應除咗呢間公司的財務董事的牌...等佢不要再害人!

Anonymous said...

若眼紅他人乎, 倒虛心向學乎.
買家兮願買之, 賣家兮願賣之.
各牟各利益乎, 各承各風險乎.
他君兮使財技, 我卿兮可取捨.
市場兮自由乎, 制度兮遊戲乎.

thomas

Anonymous said...

http://www.latimes.com/news/opinion/la-oe-boot14sep14,0,876091.column?coll=la-nav-sectionfronts

唔通 thomas 喺楊致遠?

Anonymous said...

聽落 thomas 有D 自辯口吻!

唔通係關連人仕?

証監留意一下至得喇!

Anonymous said...

897, I have brought this company and hold for 3 months in 2003, price is 0.004 (Under 0.01), but I was sold before it raise crazily. 原來走在曲線前係咁樣, 冇隱!

Anonymous said...

897, I have brought this company and hold for 3 months in 2003, price is 0.004 (Under 0.01), but I was sold before it raise crazily. 原來走在曲線前係咁樣, 冇隱!

Anonymous said...

其實買897都預咗佢係咁啦, D shop 都冇人買嘢嘅! 個殼5仟6百万??? 諗吓得唔得?

記得當年(2003)話供唔供, 原來係振倉! 跟住話同某大藥廠合作, 跟著就升, 直到蔡生入股, 然后在好消息下急跌!

Anonymous said...

每年佢主席都話寄望下年度有盈利貢獻....如是者一年復一年....愈蝕愈金。供股又供完又供....股本就10合1...100合1, 合完又供, 供完又合....."位記"諸公有否廉恥?

如果香港上公司好似李業廣提議咁設升降制度, 我估呢隻股票一早就俾人降落最低組別喇!

Anonymous said...

個間公司的董事總經理是香港會計師公會會員