閱報

特首辦…

　　開工，先看看報紙剪報如何評論我昨天的表現。嘩，成二萬字的施政報告，個零鐘念完，仲想點？最衰讀到尾後，開始攰，將「非政府組織」念成「非法組織」，好彩我行走江湖三十幾年，笑兩笑，即時過關。

　　OK，睇睇先，長毛企起身抗議的報道甚少，好事。一早預咗你，畀多兩三分鐘我定定神，唔該晒。

　　什麽？又說我政改方面着墨不多？FT還說我避提政改方案？大佬呀，我把口講埋，Rafael仲有嘢做？今日已經大把新聞，又神六升空，又施政報告，又全運開幕。如果連政改都講出口，我怕你A1頭版唔夠位。

　　政務司財政司如何分權？練乙錚話問責制是廢宰相，我今次還相於民，仲還夠兩個，又唔高興？一個宰相怕他獨攬大權，兩個分而治之，呢招高。兩個宰相到時互相爭取表現，要找接班人都有根有據。這是向當年Jack Welch學習。人家是一氣過三揀一，我已經算收斂。

　　那些新開設的政務助理又要駡？這是向當年毛主席引蛇出洞偷師，一次過將民間、政府想從政的人揪出來，及早觀察，適時洗腦。這條清晰的發展政治事業途徑，其實連我都不知會去邊？

　　政治之外，我那些環保方向幾有創意嘛，報紙寫咁少。我要政府出年帶頭將耗電量減少1.5％，本來幾有睇頭，但弊在早幾日「十一．五」計劃要能源消耗比上一個五年少20％，搞到我好似咁小家，好彩香港記者冇幾個會留意。

　 　來來去去都是熟口熟面那幾句，搵人攞soundbite又係同一班，我份苦心，擺咁多創意花臣，又禁區、又混合引擎汽車、又讓外地專才來港短住視察，通 通輕描淡寫。還好，識得上Google搵到我埋尾兩句詩是出自王安石。這招就是學自內地官場的讀唇術，要你們估詩中含意。報紙都有寫兩句王安石是改革家， 曾經變法，識猜度我憑詩寄意。不過，班記者未有寫王安石對頭極多，又有司馬光，又有三蘇，非常應景啊！

　　呢句最妙，說我是看守政府，白癡。一睇我這份政府重組部署，就知我有排做。唔信我，都要信溫總。他贈我祖宗那兩句：「士不可以不弘毅，任重而道遠。」知否下兩句是啥？「死而後已，不亦遠乎。」溫總要我做到死為止，明冇？