仿尤明實錄

向丘世文致敬

「原來搵人買起賢仔右手的背後主謀是他繼母，你都咪話唔驚呀吓。」

　　「咪係。以前粵語長片，馮寶寶被後母虐待，最多都係冇飯食。家陣時勢唔同，分分鐘連手都冇埋，諗起都毛管戙。」

　　「最唔抵就係賢仔，警察咁快破案收工，劉德華都唔知仲去唔去探佢。」

＊　　　　　＊　　　　　＊

　　「嘩！仲以為有十幾個魚塘乾淨冇毒，可以食番魚，原來有幾個一早乾塘，搵條魚睇下都冇。呢鋪真係畀佢玩殘。」

　　「嗱，呢Ｄ就叫政治喇，話畀你班香港人知，如果冇用孔雀石綠，Ｄ魚塘就做唔住，搞到乾塘，即係話唔用唔得；加埋周一嶽日講夜講，話每日食唔夠幾百斤唔死得人。久而久之，香港人又咪當冇件事，死死地氣食番Ｄ毒魚。」

　　「係喎！呢招都算毒。弊！遲Ｄ特首帶晒全部立法會議員去廣東考察，依家政府咁高招，會唔會畀晒Ｄ毒魚佢地食，搞到有幾件番唔到嚟香港㗎！你知啦，特首咁鍾意請人食魚。」

＊　　　　　＊　　　　　＊

　　「Ｄ散戶登報紙抗議炒窩輪畀發行商搵笨，要證監出手做吓嘢，你估會唔會真係有下文吖嗱？」

　　「唔係嘛，晨早都知炒窩輪一開波就輸九成，竟然搞到登報紙？」

　　「有冇咁誇張呀？輸九成。」

　　「同你正經講計數你都唔會明。嗱，好似你去玩Blackjack，一坐低，落完三百蚊注，仲要畀多五十蚊做貼士，未派牌已經開始輸錢。

　　你諗住記性好，記得晒八副牌，點知莊家原來有無限牌，派極都有煙士，就算你係Scholes識計數，一樣可以輸在那副冇得計的無限派牌機。

　　仲有，最攞命是連莊家都坐低埋同你一齊賭，而且仲要係守尾門。就算你副牌靚到絕，一樣可以輸，死未。」

　　「嘩！如果輸硬嘅，仲有咁多人炒？」

　　「唓，賭仔明，你上次喺澳門輸剩幾舊水，咪一樣返轉頭。行啦，落船喇。」