歷史重演

冇得揀，今日一定要寫這一單傳聞交易。

　　電盈（008）公布，有第三者提出收購公司的電訊及媒體生意。傳媒披露，是Macquarie計劃用三百幾億港紙現金收購。消息一出，當然是報紙頭版新聞。

　　既然交易未有落實，計數沒有意思，看看其他非數字的含意。

　　電盈似乎是賣資產而非賣公司，賣走電訊及now之後，只剩下地產生意。到時，電盈變身地產股，靠貝沙灣搵食。作為地產股，我想不到電盈會有什麽前途。換言之，報章說李澤楷exit並不正確，因為只有前腳踏出門口，後腳仍在門內，未走得晒。

　　Macquarie是財務投資者，但電盈背後卻已經有另一個財務投資者。新橋年初用一億幾美金買下四分一盈拓股份，間接持有近6％電盈股權。李澤楷想賣資產，新橋都可以出價。到時，Macquarie跟新橋將價錢愈bid愈高，是交易能手的基本本能。

　　網通（906）發表聲明，反對電盈賣資產，但李澤楷醒目，賣資產而並非將整間電盈拱手相讓，網通那20％未足以根據takeover code將交易殺掉，要按照listing rules經股東大多數通過。李澤楷相信亦毋須abstain。

　　似曾相識？看看2002年寶途如何賣走聖誕樹，就一清二楚。歷史重複自己，又一證明。

　　李澤楷執靚電盈後，立即心思思想賣，做交易的人，是無心做生意的。

　　那麽，買《信報》是為何？要將《信報》執靚再賣，相信要比電盈難度更高，起碼《信報》冇地。