心急

本來一心等年報面世才大寫特寫，似乎等唔切。

　　聯想（992）宣布，與IBM訂立協議，容許後者的股票禁售期提早一年。本來分三年每年只賣三分一，現在即時可以賣三分二，下年11月1日後全部賣得。

　　IBM趕頭趕命，想早日沽清，再加上聯想去年業績令人失望，雙重打擊，睇怕應該沒有券商夠膽在這時出份報告叫Buy。

　 　聯想容許IBM提早沽清，寥寥數筆，沒有說明基於什麽原因，似乎欠投資者一個公道。IBM手持接近一成上市股票。如果當中六億幾股隨時可以拋出市場，以 平時大約兩千萬股成交，要成個幾月才賣晒。不過，25號簽訂協議，之後的成交已升至每日四千萬股、七千萬股，到30號更超過一億股，證明有人已經急不及待 拋貨，要錢不要股。

　　聯想業績差，係人都知，但如果數洞悉聯想未來底蘊者，首推IBM。等多一年都等唔切，可想而知在IBM心中，聯想將來有多少斤両。

　　買入IBM PC之後，聯想業務遍布世界。不過，最賺錢的卻是大陸，有近6％ margin。美國？1％都冇。

　　聯想去年花了五億幾重組費用，公道一點，會否只不過一時失手，以後會有好日子過？但未計入所謂重組費用，美國都只不過是1％多少少。換言之，花一百億買一盤大生意回來，反不及自己地頭那檔舖頭仔好賺。

　　聯想還有其他地方大把有得寫，留待足本真身亮相時，才跟你算賬。