牛肉枱

原來這半版已經改名，不再叫做「財進才俊」，打回平凡，叫番做份份報紙都有的「理財投資」。理財投資、投資理財、個人理財、股市投資，這幾個字堪稱百搭。我不懂理財，疏於投資，怕會陀衰這四個字。

＊　　　　＊　　　　＊

　 　朗拿甸奴爬過碧咸頭，成為了全世界賺錢最多的球星。除了是因為碧咸日漸走下坡，以及年老色衰、睇到厭之外，我希望是反映世界開始注重牛肉，而並非單靠形 象外表。足球員最重要是講技術，講球場上的表現，如果本末倒置，足球場變為catwalk天橋，出場前先要髮型師恤靚過頭，上場時必定凝神皺目，塑造英雄 萬人迷形象，似乎有負我三更半夜爬起身睇波的一番心機。

　 　這種fancy牛肉症，見諸於流行樂壇。近期冒起的新人似乎還唱得兩嘴，並非純靠外表的公仔錄音機，這當然要拜MP3所賜。Download「快勞」， 毋須見樣，先要歌甜後要人靚，不再靠CD封套特大poster作賣點，自然要唱得多於睇得。科技扼殺了舊有行業生存空間，副作用是將行業重心扶回正軌。

＊　　　　＊　　　　＊

　　既然是牛肉至上，我當然要反省究竟理財投資的牛肉是啥。但是回顧我這張front desk，從來未賣過理財，未賣過投資。老細叫我賣牛肉，我就日日賣緊豆腐花。若非老細將這張枱改錯名，就是搵錯人坐枱。

　　要牛肉，我冇，因為我似碧咸多過朗拿甸奴。