碎料

你班馬騮，趁我疊埋心水搞其連任，竟然一個二個出來搞搞震，想試一試我新請那兩個智囊的真功夫乎？我既然夠膽填政治家，這些政治問題，濕濕碎矣。莫講話我現在有左右門神幫我度橋化解，就算我以前單拖上陣，一樣應付有餘。

　　昨晚臨瞓前寫了張政治to-do list，等我度兩招，再等良仔幫我睇睇。

　　九鐵，新鮮熱辣，全城哄動。那些二流政治分析員，左一句「有損強政勵治」，右一句「加劇深層次矛盾」，毫無水準。政治家最高境界，是化危為機。這次九鐵迫宮，才是我強政勵治的最好時機。

　　我要九鐵管理局三日內開會諗計搞掂。管理局入面有什麽人？有冬冬及馬仔。將來連任成功，班底換人。這一筆賬，大派用場。政改咁大件事，都未可以動我分毫，九鐵這單勞資糾紛，又豈會叫我連任受挫？反而是機會，睇清楚背後還有什麽敵人，良仔最喜歡。

　　添馬艦，更加簡單。要我去啟德機場，日日食黃珍珍樂口福，連市民都覺得你戇居。我唔駁咀，由得你自己講，都已經夠你失分。你反對我响添馬艦起總部，如果我話要推出整幅地皮拍賣，起多一幢國金，左右後面那一大班寫字樓地產商都會自動走出來撑我，到時又睇睇邊個拳頭硬。

　 　禽流感、承建商墊支、警監會資料外洩、散養家禽朝令夕改，外界將每一單都同我連任事情掛鈎。講真，逐單埋身都可能要花時間想想拆解辦法，一次過全部亮 相，反而毋須擔心。傳媒注意力有限，眼見枱面有幾單大新聞，分身不暇，未有時間日煲夜煲，轉過頭幾日，市民記憶又會被新頭條蓋過。

　　你睇睇今日頭條，九鐵之外，就是講今朝得九度，香港人掛住打邊爐，邊得閒數我手上有幾多單大大小小政治難題。你見我民望持續高企，就知我淡定得有道理。

　　愈睇愈冇味道，未需要政治家出馬，留番畀良仔，免得他太清閒。