2.5.06

釘蝨乸

從來未試過寫文,寫得如此戰戰兢兢。  

精電國際(710)公布業績,由盈轉虧。本來是平常毫不起眼的工業股,因為有你坐鎮的緣故,變得受人注意。

  上市公司的財技企管逃不過你的法眼,任何差池被你銳利的筆鋒斬瓜切菜,一份份整齊地放在文字上遊街示眾。強將手下無弱兵,自家公司出品的年報,擺得上枱面給你老人家過目,斷估不會失禮於人。由我在你面前獻醜,你即時知道我究竟還有沒有。

   精電蝕錢,其中一個原因是重手抹走一批固定及無形資產。固定資產減值是因為學人人搬廠搬寫字樓,有客觀條件要求;但無形資產商譽要狠心抹掉,往往是主觀 意願居多。這次是一半一半,既然銀碼並非太大,因利乘便,一次過抹走,換回一張乾淨的balance sheet,好事。

   但蝕錢的另一主因,應該是投資失利。長線持有的可供出售投資,去年總共購入了三億幾港元。本來未變現的虧損,只須在儲備計數,但去年就主動減值一億七千 萬,差不多等同稅前虧損的總數。什麽原因要為2005年剛開始的投資,在年底就打定輸數,即時減值?相比和黃(013)要千方百計避免資產減值而影響盈 利,精電是爽手俐落得太厲害,對抹走賬面可能出現的虧損,毫不手軟。要留意的是,這類減值行動是不可以掉頭走,意即不容許今年說減值,下年說上年太重手而 回撥,一減就一世,不存在控制盈利水平的意圖。究竟是投資失利太過明顯,無法拗贏核數師,又或是果敢決斷,勇於即時處理投資錯誤?不得而知。

  年報不單只要睇數,還要睇字睇披露。在這方面,你都甚有新猷。那篇行政總裁訪談,雖然未算前所未見,但比起其他一式一樣的管理層分析,總算較為新鮮。至於是否答齊投資者關心的問題,見仁見智。

   還有,相信你不會怪我八卦,看看你幾錢人工。那段董事薪酬披露,就可謂空前但未必絕後,連認股權折算的金額都計入在內。這一項披露,連港交所都未有做 到,你卻開創先河,一流。不過,你未必留意,這認股權折算跟另一邊資本儲備入賬並不夾數,出現差池,是為瑕疵。應該是畢馬威的同事,在bulk print時太眼瞓,睇漏眼。你應該打電話給卡臣,叫他下年減fee。

  由將軍澳搬回觀塘貨倉,夠晒實幹;加上一連串的抹數,相信是策略調整,重新出發(可能同樣是晴朗的一天)。你這樣多事情要傷腦筋,還可以出書上電台,佩服。

  班門弄斧,套用你寫的那四個字:多多指教。

7 comments:

Anonymous said...

港燦筆記
並非財經網誌

http://kong-chan.blogspot.com/

覆街坊 : 精電 (710)
街坊小丙 :

1. 點解咁多股票你唔問,偏偏問我唔熟既 精電 (710) ? 另申報,我現時並無持有精電既股票。

2. 小燦對 TFT 及 OLED 的市場無乜涉獵。半導體股有半導體和 DRAM 指數、航運股還有波羅的海航運指數參考 ( 可上台灣 鉅享網 登記後找到 );資源股重好,網上有大量它們的相關商品期貨圖表參考。 OLED 及 TFT 的市價並無上述指數那麼易找到免費公開資訊。我等只能用 lunch time 食完飯撩牙時間,係咁意掃瞄下報紙裡既上市公司通告來尋寶既街坊,唔知價就係唔知價。暫時搵到較 "就手" 既市場資訊,係 DisplaySearch PriceWise 既 LCD A Grade 顯示屏組件每月平均價目表 。

對電子電腦元件價格毫無頭緒但又想抓個大概時,小燦習慣先去 Isuppli 找找有無免費資料下載,拿個大約印象先。咁好彩我找到以下兩個圖 :

一個係關於平面顯示器未來成本價估計, 張圖 話比我知,同所有電子產品一樣,平面顯示器既元件成本價,於可見將來,只會越黎越平 :



另一個係關於 OLED 整個市場塊餅有幾大既 估計,好消息,舊餅將越來越大 :



兩張圖拍埋一齊睇又顯示到 d 乜 ? OLED 元件市場競爭激烈,雖然市場份額續有增長,毛利未必因接得單多就增加到,除多接單外,要靠嚴控成本,賺出口匯價,或比行家掌握更多有市場價值既專利技術,就係咁多。即係,講左等於冇講。

Isuppli 當然有 OLED 元件市場更詳細,對評估 "精電" 有冇運行更重要既資訊,但要比錢買。小燦一見到 "add to cart" 字樣,即閃。

精電本身並非做 end product,唔同 唯冠 (334),上各電腦場問下 Proview 出既 Mon 或佢代 Samsung 啤既 mon 好唔好賣,都可夾粗斷估唯冠未來接單情況如何。

小燦也嘗試上網查查各 OLED 元件 主要製造商,睇下其他上左市廠家既股價表現。當中,找到三間上市響 Nasdaq 上市既 OLED 廠商之股價圖 : "AIXG"、"AFCO"、及 "OLED"。三間公司既股價圖表現參差,暫時話唔到比小燦知,OLED 元件市場,整體是否好景,只覺仍有增長。從上述的廠家列表中,小燦得出既初步印象係 : (1) 精電並非 OLED 元件市場的最大廠商;(2) 呢個市場已有唔少大廠環伺,精電現在轉攻 OLED 要企穩陣腳並非容易。

亦唔覺精電特別依賴某一間公司既訂單,即唔可以睇佢客戶既股價走勢,推斷番精電既接單情況,只知佢內地手電廠商顯示屏既接單因呢班廠商被黑市手機打殘,令佢今年不論營業額同毛利率均有倒退。

3. 所以,我等知 d 唔知 d 既,都係睇佢四月公佈見紅業績後市場點比 反應 至實際 ... 公佈業績後有支大成交配合既大棍 (A-B) 話比我知,市場反應係正面個播 :



以往教訓,如果出左 A-B 呢一支大棍,之後調整又好,整固 ( 整蠱 ) 都好,股價通常頂多只回調去 A-B 既中間,即 C 點既價位就會再上。假如你放假前入左貨,之後它股價若跌穿 C 點後三個交易日內都唔肯上番 C 點樓上,街坊們通常已打靶。如果連 B 點既價位都跌穿埋,一定要斬。

做埋老細交低既功課先,有時間再寫少少關於精電間公司本身。


posted by 港燦 at 1:14 PM 0 comments links to this post


覆街坊 : 精電 (710) [續]
街坊小丙 :

1. 續講精電。通常任何一間做廠的公司之業績公佈,一到小燦手裡,第一時間必先做以下的快速測試 :

[1.1] 05 年 營業額 $1,980m,04 年 $2,006m;但除稅、利息及資產減值 ( impairment loss ) 撥備前的盈利 : 05 年 $144m,04 年 $249m。再同 中期業績 比較 : 05 下半年經營情況更遜上半年。Gross margin : 05 年 34%,04 年 38%。馬上睇睇 各地業務分佈 : 內地業務所佔比重由 04 年 47% 下降到 05 年 42%,歐洲維持 32%,其他比例大置保持一樣。

核心業務倒退,唔使理第二 d ,即睇公司的流金資金情況有無惡化。

[1.2] 做個 working capital turnover 測試 : 睇睇間公司,平均

- 由製成品完成後到賣出要幾多日 ... ( inventory x 365 / cost of goods manufactured and sold ) ... [a]
- 由製成品賣出後到個客找數要幾多日 ....... ( accounts and other receivables x 365 / turnover or sales ) ... [b]
- 幾多日要找供應商賒數 ... ( trade and other payables x 365 / cost of goods manufactured and sold ) ... [c]

通常遇到既情況係,[a]+[b] > [c]。即係由完成製成品到交付給客人到個客找數既日子,重長過供應商既數期。以往經驗歸納所得,這類公司的流動資產 / 流動負債至少要有 1.5 倍才安全。精電則為 2.7 倍,故問題不大。計左一輪,精電生意做少左,但存貨比 04 年去得快左,收數亦快左,存貨積壓已作撥備、亦唔覺被供應商 cut 數期、或被客拖數既情形。

又查看 集團資產負債表 有無 "關聯" / "聯營" 公司應收賬或類似既 item。若有,再睇睇它的結餘是否越積越大,或和營業額同步增加。唔少賬目靠呢度做手腳。精電好彩呢類賬項。

[1.3] 再睇 現金流量表,經營業務淨現金流 : 05 年有 $ 2.43 億,不過用突晒來給它的廣東省河源廠房 ( 蔡東豪先生 : 當地供電穩定嗎 ? ) 增加設備,及購入 近 3 成韓國 OLED 製造廠 Ness Display 權益 ( 用左 US 20m,成億六港紙 ) ,04 年經營業務淨現金流只有 1.33 億。 但相對 05 年比 04 遜色的 EBITDA 已相當不俗。

[1.4] 再睇派息 : 05 同 04 年一樣保持到每股全年派息 38 仙。公司 05 底持現金及 cash equivalents 4.16 億 ( 每股現金 $1.29 ),但至少須再預留約 $38.5m 作增持與清華大學合資的兩間名為 "北京精電蓬遠 X X " 公司既權益 ( 由五成多增至九成 )。再做些教科書實有教的 liquidity tests : 總流動資產 / 總流動負債 - 05 年 2.7 倍,04 年 3.4 倍;銀行貸款及透支 / 資產淨值 - 05 年 7.4%,04 年 6.1 %。計及年內搬廠,新置機器和購入 Ness Display 權益後,精電的 liquidity 仍算穩建。昔日皇牌 - 傳統黑白灰 LCD 顯示屏業務雖現夕陽西下之勢,但它的財政狀況底子不弱,有得守。


2. 經過一輪快速測試後,再睇睇 主席報告書 所載之資產減值撥備詳情、損益表各 撥備細目 同 股價圖。股價圖暫時話比小燦知,股民相信精電趁今年業務倒退,及把將軍澳和馬來西亞廠房 關閉並完全撤退返廣東河源時,將舊廠房既資產值、相關既商譽、過時既知識產權,連同仍 蝕緊錢 既 Ness Display 權益,統統先行作充份減值撥備,等佢盤賬以後輕裝上路,之後改攻更時興和高利錢的 OLED、TFT 及其他自行研發的顯象技術係龍係蛇,能有個更清楚的交待。


3. 精電既情況有點似蔡東豪先生以前任職既商台 : 管理層早知原本既皇牌產品已呈頹勢,如不轉攻新產品 / 推新節目,必定瓜柴。可是新產品 / 新節目的市場已有列強盤倨,能否比佢突圍,小燦自問未睇得通這個市場,但精電一向識得從整個顯示屏市場中,發掘一 d 如醫療儀器顯示屏較少人爭、市場份額雖少但利錢比做大路消費品更高既分眾市場。股價已對佢面對緊既轉型期作出反應,現價位相對安全。


posted by 港燦 at 4:55 PM 6 comments links to this post


6 個意見 關閉此視窗 摺疊意見
sungpolum 提到...
過癮過癮,真係禮尚往來,今次應該輪到蔡生眼眉跳,小丙哥開左個好題,好野好野﹗﹗

小弟手痕提供多幾個角度畀大家思考,純粹玩野,唔啱聽唔好丙我。

1.個人所寫的文章水平與營運管理水平是否相關?即吹水與辦事能力是否成正比?

2.專注力與工作表現是否相關?即CEO做兼職會否影響公司業績?唔係掛個名個d,係日日寫幾千字財經評論(加食評食譜)個d,寫到變成某知識分子報皇牌專欄個隻,遲d仲好似會開咪做埋dj,付出的時間心力斷估唔少。

3.外行人管內行人究竟掂唔掂?商台一役牽涉因素太多,可謂非戰之罪,tong哥今次可唔可以威番鋪呢?

4.大股東同金手指基金都增持股份,股價係唔係老馮會升?

5."現價位相對安全"可唔可以擺入財經演員專用術語辭典當中?

5/01/2006 06:32:18 PM


小丙 提到...
我只是見它今年做撥備做得幾徹底,例如把以前的無型資產和商譽全撤走才對它有興趣,別無其他。

"現價位相對安全" 燦兄你說話乎 ? 世上從未出現過安全的價位,只有之後贏錢或被逼斬首你才知安全否。

sungpolum 兄問的 (1) - (4) 題都要時間証明。精電購入那韓國廠的條款頗複雜,看來是蔡生親自設計的。韓國廠能否發揮它的威力,到 08 年前自有分曉。我相信孔生寫文不用花很多時間,對他日間正業影響不大。

這公司還有兩項我也未看通的地方 :

1. 它有兩位主席,於香港各上市公司中不常見。公司正如燦兄所言位於轉型期,最易出現兩位主席意見相左的機會。如何協調彼此的矛盾,考功夫。

2. 它於 05 年尾有等值 1.34 億的香港上市股票投資。05 年也有近千三萬的股票已售或賬面利潤入賬。雖然燦兄認為它 05 年尾的財政狀況仍未算差,但它的轉型,頗有破釜沉舟的決心。管理層趁現在高位把這些股票套利,留多點錢作科研更可取。

5/01/2006 08:58:51 PM


港燦 提到...
小丙 : 可幸的是兩位主席 05 年底持股並非相近 - 張博士 (62 歲) 持股 1.93%,高振聲先生 (54 歲) 13.31%。VP 於 05 年底則持 6.97%。

我看兩位主席的安排,應是張博士已安排高生作接班人的步署,而日常運作則交由蔡生負責。

Sungpolum,讓蔡生於實踐中不斷檢驗自己所寫所讀的是否流於空談,對蔡生絕對有益。而且,正如小丙所言,蔡生寫文章不會影響他的日常工作。

5/01/2006 09:47:40 PM


Martin Oei 提到...
我睇盤數無小燦咁叻,但OLED同TFT呢兩個市場,我一直有留意。

TFT基本上精電已經無得打,因為台灣廠本身都大玩合併同埋垂直整合,精電在多個主要關鍵技術層面。無個掌握到,咁問你點同台灣/南韓廠鍊?

OLED係仲有機會突圍,問題係,精電投放幾多在R&D先,對精電呢類孤軍黎講,最好係掌握一兩個關鍵技術環節後,快快同其他大公司整合,可能對精電股東最有益。

身為蔡生的舊部下,我對蔡生的能力絕不懷疑,問題係,精電做緊果行,環境好嚴峻。

5/02/2006 03:01:05 AM


港燦 提到...
Martin :

我對 OLED 和 TFT 不認識。一路看精電的年報和網頁,它看來對自己某些出品的耗電量和光亮度頗有信心。

5/02/2006 08:51:55 AM


港燦 提到...
希望蔡生會順道看 comments,因為這裡 comments 才是精華。

今日方卓如也是寫精電。我聚焦在它的流動資金和財政狀況上,方生則質疑精電為何急於把 05 年的新投資大手減值。

這種大刀闊斧的決定,可能正是精電高薪騁請行外人蔡生任 CEO 的主要理由。問題是 05 後精電的新投資,蔡生若仍舊須狠心把它一買回來就先行減值,任何大小投資者和精電的往來銀行也會認定這公司的投資決策過程,流於草率,信心大打折扣。

5/02/2006 11:17:53 AM

Anonymous said...

Good article, aggressive and wonderful, expecially the heading,and the end of the article. Pending to your neighbour's response.

Anonymous said...

日期: 二零零六年四日二十六日
時間: 中午時分
人物: 香港特別行政區首長, 銀行公會主席, 大、小銀行總裁
地點: 四季酒店大禮堂

「順便一提, 在剛過去的復活節週末, 你們都在那裡呢? 我猜, 好些人正在珠三角打高爾夫球, 好些人正在泰國享受按摩或水療。 可是, 在受難日, 中國人民銀行把第五號報告通告放在官方網站公佈了。 你們有沒有看過呢? 這是關於QDII的。 三天後, 公佈了暫行辦法, 你們這群傢伙都在那裡呢? 你們合該在復活節的週末工作。 你們合該敲周小川的門、 敲劉明康的門。 可是, 你們卻在玩高爾夫。 你們走寶了!」

罵得好! 香港銀行界之流弊, 不盡在於管理人耽於逸樂、欠缺進取, 而是銀行執行長們目光如豆、急緩不分, 整天價專注於搔首弄姿, 忙於賣弄形相, 置業務結構的長遠發展於不顧; 兩字記之曰「活該」!

看來銀行界務需反思, 優化產業結構, 戒掉虛妄浮誇, 以務實的作風重新上路

Anonymous said...

「整天價專注於搔首弄姿, 忙於賣弄形相」
有何論證?
我不是不讚成,而是覺得 貴兄台論證不足。

Anonymous said...

試看看「銀行界梁朝偉」, 當年在「藍綠」行任港區 CEO 時, 安排員工參加 "Rave Party"。

復又錯誤引入「中銀香港」作策略性伙伴 [注意: 錯在非「中國銀行」, 只是「中銀香港」], 如此「賓卡」, 竟可入局「獅子」行, 哀哉, 哀哉。

Anonymous said...

江湖客:

實在不敢苟同你的論點。香港的賓架如何"整天價專注於搔首弄姿, 忙於賣弄形相"呢?

因為王生安排員工參加 "Rave Party"?
還是因為引入「中銀香港」作策略性伙伴?

請留意銀行內的工餘活動,志在輕鬆,舉辦何種活動只要合法合規便無傷大雅。再問引入中銀香港作策略性伙伴為何時?此一時彼一時,當年國內的環境與現在可有天壤之別?

敢問留意到曾生講話真正含意的人有多少?我看他是擺姿態給國內同胞看,與香港賓架"扯貓尾"罷了!Take it easy!

Anonymous said...

On the Chinese board A - G 鋅業(000751), is expected to make 36 tons of Indium this year. Please see the following link: http://bbs.fmm88.com/dispbbs.asp?boardid=7&id=1201&star=1&page=1